අඹ පැළේට වැඩිම හානිය රතු පටි පැළ මැක්කාගෙන්
අඹ තවාන්වල පත‍්‍ර පිළිස්සීම හේතු කොටගෙන පැළ මිය යාමට හේතුව ලෙස සොයා ගෙන ඇත්තේ රතු පටි පැළ මැක්කාගේ හානියයි. මේ පළිබෝධකයාගේ හානිය වියළි කාලවල සහ පරිසර උෂ්ණත්වය අධික පෙබරවාරි, මාර්තු සහ ජුලී, අගෝස්තු කාලවලදී වැඩිය.
මේ පැළ මැක්කාගේ ප‍්‍රධානම ධාරක ශාකය අඹ වන අතර වැඩි වශයෙන් හානියක් සිදුවන්නේ තවාන්වල ඇති අඹ පැළවලටය. කොකෝවා, කජු, පේර, කොට්ටම්බා විලෝ, අලිගැටපේර, පෙයාර්ස්, මැංගුස් ශාක ද මේ පැළ මැක්කා ධාරක ශාක ලෙස ගනී.
පත‍්‍රවල යටි පැත්තේ ප‍්‍රධාන නාරටි ආසන්නව ඇති අවපාත තුළට වී පත‍්‍ර යුෂ උරා බොනු දැකගත හැකිය.
ආරම්භයේදී වැඩුණු පත‍්‍ර මතුපිට කුඩා දුඹුරු පැහැති පැල්ලම් දක්නට ලැබෙන අතර පසුව ඒවා ක‍්‍රමයෙන් විශාල වේ. සති දෙකක් පමණ ගතවන විට පත‍්‍රයේ ධාරක ආශි‍්‍රතව පිහිටි විශාල දුඹුරු පැහැති පිළිස්සුම් ආකාර පැල්ලම් හෝ මුළු පත‍්‍රය පුරාම පැතිරුණු පැල්ලම් දක්නට ලැබේ.
පත‍්‍ර ධාරය රැලි ස්වභාවයක් පෙන්නුම් කරන අතර හානිය උග‍්‍රවූ විට පිට පැළෑටිවල කඳේ ද පිළිස්සුම් ලක්ෂණ පෙන්වයි.
මේ පිළිස්සුම් නිසා අග‍්‍රස්ථ අංකුරයට ද හානි පැමිණෙන අතර අංකුරය දුඹුරු පැහැයට හැරී වියළි යයි. අග‍්‍රස්ථය වියළී යාමත් සමඟ ම ශීඝ‍්‍රයෙන් වැඩෙන තක්ෂීය අංකුර දැකිය හැකිය.
එම අවස්ථාව වන විට පත‍්‍ර බොහොමයක් ආසාදිතව වියළි ගිලිහී ගොස් ඇති බැවින් පලිබෝධකයාගේ ශිෂුවෝ සහ සුහුඹුලෝ වැඩෙන තක්ෂීය අංකුර මතට පැමිණ යුෂ උරා බීමට පටන් ගනිති. එසේ වීමෙන් එම තක්ෂීය අංකුර ද වියළි අඹ පැළය මිය යයි.
රතු පටි පැළ මැක්කාගේ සුහුඹුල් අවධියේදී මිලිමීටරයක් පමණ දිගය. තද දුඹුරු පැහැතිවේ. බිත්තර වකුගඩු හැඩැතිය. දින 12 - 18 දී බිත්තර පුපුරා ශිෂුවා පිටවේ.
කහ පැහැති ශිෂුවාගේ උදරය උරසට සම්බන්ධ වන ස්ථානයේ උදරය වටා පැහැදිලි රතු පැහැති පටියක් ඇත. මෙම රතු පැහැති පටිය නිසා රතු පටි පැළ මැක්කා ලෙස හඳුන්වයි.
රතු පටි පැළ මැක්කාගේ ආසාදනයට පහසුවෙන්ම ගොදුරු වන්නේ දුර්වල වර්ධන තත්ත්වයන් පෙන්නුම් කරන තවාන් පැළ වේ. නිරෝගි පැළවලට ආසාදනය වීම සිදුවන්නේ කලාතුරකිනි.
තවාන් පැළ දුර්වල වීමට එක් ප‍්‍රධාන හේතුවක් වන්නේ බදුන් තුළ ඇති ජල වහනයයි.
එබැවින් පැළ මැක්කා පාලනය සඳහා තවාන් පස් මිශ‍්‍රණය ඉතාමත් වැදගත්වේ. ජල වහනය හොඳින් සිදුවන තවාන් මිශ‍්‍රණයක් ලබාගැනීමට වැලි මතු පිට පස් සහ කොම්පෝස්ට් 1 1 - 1 අනුපාතවලින් මිශ‍්‍රකොට යෙදීම සුදුසුවේ.
මෙහිදී උපයෝගී කරගන්නා මතුපිට පස් දිරාගිය කාබනික ද්‍රව්‍ය අඩංගු සවිවර වසනයක් සහිත පසක් විය යුතුය.
අඹ පැළවලට හානිය දරුණු ලෙස පැතිරීමට පෙර පිළියම් යෙදීම වඩාත් ම ඵලදායි වේ. මෙම පළිබෝධකයා පාලනය සඳහා කෘමිනාශක පත‍්‍රපෘෂ්ඨයන් තෙත් වන අයුරින් යෙදීම අවශ්‍ය වේ.
රසායනික ද්‍රව්‍ය යෙදීම සවස් කළ සිදුකිරීම මඟින් වඩා හොඳ ප‍්‍රතිඵල ලබාගත යුතුය.
No comments:
Post a Comment