පැෂන් ගෙඩියේ වතුර ගෑවෙන්න දෙන්න එපා
පලතුරු කෑමට දරුවා අකමැත්තක් දක්වන නිසා බීමක් විදිහට දරුවාට පලතුරු පිළියෙළ කර දීමට ඔබට හැකියාව තිබේ. ඒ ආකාරයට පිළියෙළ කර දීමට හැකි පලතුරකි වැල් දොඩම් හෙවත් පැෂන් ෆෲට්.
ඔබේ ගෙවත්තේ වවා ගැනීමට හැකියාව ඇති වැල් දොඩම් ඉදුණු පසු ප‍්‍රණීත බීමක් සාදා දරුවාට පෙවීමට හැකි ය.
පැෂන් ෆෲට් දළු හීනියට ලියා ගා ගත් පොල් සමඟ ගම්මිරිස් කුඩු, ලුණු, උම්බලකඩ, ලියාගත් ලූනු දෙහි ඇඹුල් ස්වල්පයක් කවලම් කළ පසු රසවත් සම්බෝලයක් ලෙසත් ආහාරයට ගැනීමට හැකියාව තිබේ.
වසර මුළුල්ලේ ම හොඳින් පැතිරුණු වර්ෂාපතනයක් ඇති තෙත් කලාපයේ ඔබ ජීවත් වෙන්නේ නම් වැල් දොඩම් වගාව ඉතා ම යහපත් ලෙස කළ හැකි ය.
වියළි කාලවල දී මනා ලෙස ජලවහනයක් පැවැතිය යුතු ය. කුඩා පැළ කාලයේ දී ගොම, කොම්පෝස්ට් පොහොර දැමීමෙන් පැළය සාරවත් ව වැඩේ.
දඬු කැබැලිවලින් සහ බීජවලින් පැළ ලබා ගැනීමට හැකි ය. බීජ මගින් පැළ ලබා ගැනීමේ දී ගෙඩිය පළා මදය සූරා යුෂ ඉවත් කර, ගෝනි කැබැල්ලක බීජ අතුල්ලා ජලයෙන් සෝදන්න.
බීජ වෙන් කර ගත් විගස ම සිටුවන්න. සිටුවීමට පෙර බීජවලට පිටතින් ඇති සිවිය සෝදා ඉවත් කර ගන්න. දිනක් පමණ ජලයේ පොඟවා ගැනීමෙන් බීජවල ප‍්‍රරෝහණය වේගවත් වේ.
වැලි මතුපිට පස් හා කොම්පෝස්ට් සමාන ප‍්‍රමාණ යොදා කවලම් කර ගත් මිශ‍්‍රණයක් සකස් කරන්න. ඉන් පසු කැප්ටාන් පසට යොදන්න. මේ නිසා ළපටි පැළ දියමලන් කෑමේ රෝගයෙන් ආරක්‍ෂා කර ගත හැකි ය.
ඔබට බීජ සිටුවීමට හැකියාවක් නැති නම් නිරෝගී වැලකින් දඬු කැබැල්ලක් ගෙන සිටුවන්න. පොලිතින් මලුවල සිටුවීමට හැකි නම් වඩාත් හොඳයි.
හොඳින් ජලය බැස යන ස්ථානයක තවාන සකසා ගන්න. නැති නම් බීජ සෝදා යෑමට පුළුවන. ඔබේ ගෙවත්ත බෑවුම් සහිත බිමක් නම් පැළ සිටුවිය යුත්තේ සමෝච්ච රේඛා ඔස්සේ ය.
පැළය වැඩෙන විට පැළය අසලින් කණුවක් සිටුවීම මගින් පැළය වැඩි වැඩී ඉහළට යෑමට හේතු වේ.
පොහොර යෙදීම මාස 6 කට වරක් කිරීම ඵලදායී වේ. පසේ තෙතමනය ඇති විට පමණක් පොහොර යොදන්න. එසේ කළ යුතු වන්නේ පොහොර පැළයට උරා ගැනීමට ජලය උපකාරී වෙන නිසා ය.
වැල් දොඩම් වගාවට ඇතිවන රෝග අතරින් වෛරස් රෝග ප‍්‍රබල වේ. විචිත‍්‍ර රෝග වෛරසය, මුදු පුල්ලි වෛරසය සහ පිපිඤ්ඤ විචිත‍්‍ර වෛරසය මේ අතර ප‍්‍රධාන ය.
ළපටි දළුවලින් ඇරඹෙන කහ පැහැති ලප විචිත‍්‍ර වෛරස් රෝගයේ ලක්‍ෂණයකි. ලප කුඩාවට සෑදී පසුව විශාල වේ. ගසේ වර්ධනය බාලවීම ප‍්‍රබල ප‍්‍රශ්නයකි. ගෙඩියේ පිට පොත්තේ විචිත‍්‍ර ලක්‍ෂණ ඇති වීම වර්ධනය බාලවීමට හේතුවක් වේ.
මේරූ පත‍්‍රවලට වැලඳෙන රෝගයකි, මුදු පුල්ලි රෝගය. වැල් දොඩම් වගාවට අර්තාපල් යු වෛරසය ද සෑදීමට ඇති හැකියාව වැඩි ය. ගෙඩි කුඩා වීමෙන් දරුණු ලෙස වගාවට හානි ගෙන දෙන මේ රෝගය වැලඳුණු පසු ගෙඩියේ පොත්ත තද ඝනකමින් යුක්ත වේ.
පිපිඤ්ඤ විචිත‍්‍ර වෛරසය ද කූඩිත්තන් මාර්ගයෙන් ඉතා කෙටි කලක දී බෝවීමට ඉඩ තිබේ. පන්දලම් සෑදීමට ග්ලිරිසිඩිය කෝටු භාවිතා කිරීමට සිදුවීමෙන් කූඩිත්තා ව්‍යාප්ත වේ.
රෝග පාලනය
හානි වීම නිසා මැරී වියළි ගිය සියලු ම වැල් වගාවෙන් ඉවත් කර පුළුස්සා දමන්න. එමගින් කීටයා ගේ බිත්තර විනාශ වේ. ළපටි වගාවකට හානි වූ විට වැල් කපා ඉවත් කිරීමෙන් සෙසු කොටස් බේරා ගැනීමට හැකි වේ.
පත‍්‍ර කොඩවීම ද අස්වැන්න බාල වීමට හේතුවක් වේ. පිට පොත්තේ ඇති පිටතට නෙරා ආ ගැටිති ද තිබීම මගින් අස්වැන්න බාල කරයි. කප්පාදු උපකරණ මගින් ද රෝගය ව්‍යාප්ත වේ.
රෝගය වැලඳීමෙන් පසු එය සුව කළ නො හැකි ය. නමුත් රෝගය පැතිරීම අඩු කර ගැනීමට නම් ඔබට පහත කි‍්‍රයාමාර්ග අනුගමනය කිරීමට හැකියාව ලැබේ.
වැල්වල දිරිය වැඩි කර ගැනීම සඳහා ක‍්‍රමානුකූලව පොහොර යොදන්න.
පළමු මාස 6 තුළ දී අඩු ම වශයෙන් සතියකට වරක් බැගින් වගාව පරීක්‍ෂා කර රෝග වැලඳී ඇති වැල් ගලවා පුළුස්සා දමන්න.
වගාව අවට ඇති කූඩිත්තන් ගේ ධාරක ලෙස කි‍්‍රයා කරන වල් පැළෑටි විනාශ කරන්න. වගාව ආසන්නයේ වගා කර ඇති වෙනත් බෝග වර්ගවල කූඩිත්තන් සිටී නම් මර්දනය කරන්න.
නව වගාවක් ඇති කිරීමට පෙර පැරණි වගාවේ ඇති රෝගී වැල් හා කූඩිත්තන් ගේ හා වෛරස්වල ධාරක ශාක ද විනාශ කරන්න.
වෙරස් වැලඳී ඇති වගාවන් කප්පාදු කළ යුත්තේ අවශ්‍ය විට දී පමණි.
පසේ ජීවත්වෙන පිතියම් ෆයිටොප්කරා වැනි දිලීරය නිසා මුල් කුණුවීමේ තත්ත්වයක් ඇති විය හැකි ය. වගාවකට රෝගය වැලඳුණු විට පළමුව රෝගී වැල් මැලවේ. තවාන් පැළ රෝගවලට ගොදුරු වීමෙන් ආරක්‍ෂා කර ගැනීම සඳහා තවාන් ජීවානුහරණය කරන්න.
වගා බිමෙහි ජලවහනය දියුණු කරන්න. පොහොර යෙදීමේ දී වැල් ආසන්නයට පොහොර නොයොදන්න.
වැල් දොඩම්වලට වැලඳෙන පත‍්‍ර පුල්ලි රෝගය වර්ෂා කාලයේ දී වැඩිපුර දන්නට ලැබේ. වියළි කාලගුණ තත්ත්වයක දී රෝගය ක‍්‍රමයෙන් අඩු වේ. අධික ලෙස රෝගී තත්ත්වය දක්නට ලැබේ නම් පත‍්‍ර ඉවත් කළ යුතු ය. හොඳින් ඉදුණු ගෙඩි බිමට පතිත වේ.
ගෙඩියේ පැහැය වෙනස්වීමෙනුත් ඇඟිලි තුඩින් සෙමින් තට්ටුවක් දැමීමෙනුත් නෙළීමට සුදුසු දැයි තෝරා ගත හැකි ය.
දම් පැහැති වර්ගයේ ගෙඩි දම් පැහැ ගැන්වී ඇති විට අස්වනු නෙළිය යුතු ය. වියළි කාලගුණ තත්ත්වයක් පවතින විට අස්වැන්න නෙළීම කරන්න. ගෙඩියේ පිට පොත්තේ ජලය තැවැරී ඇති විට ඉක්මනින් දුර්වර්ණ වේ.
ඒ නිසා ජලය තැවැරී ඇති විට පිස දැමීම කළ යුතු ය. නැති නම් සුරක්‍ෂිත කිරීම අපහසු වේ. ඕනෑම වැල් දොඩම් වර්ගයකට මෙය පොදු ය. ලංකාවේ වැල් දොඩම් විශේෂ ගණනාවක් ඇත. තිත්ත ගෙඩි, ඩොංගා, පුහුල්, බහානා වැල් දොඩම් ඒ අතර ප‍්‍රධාන ය.
No comments:
Post a Comment